Ji ‘Gotinên Pêşiyan’ çapa nû: Divê em li gotinên pêşiyan xwedî derkevin

Çapa 3yan a pirtûka ‘Gotinên Pêşiyan’ derket. Di pirtûka ku ji aliyê Abdurrahman Aydogdû ve hatiye amadekirin de, 4 hezar û 500 gotinên pêşiyan hene. Aydogdû da zanîn ku “Divê em li van gotinên xwe yên pêşiyan xwedî derkevin û nehêlin bi kal û pîrên me re bi ax bibin.”

Weşanxaneya Na’yê çapa 3yan a pirtûka ‘Gotinên Pêşiyan’ çap kir. Pirtûka ‘Gotinên Pêşiyan’ ji aliyê Abdurrahman Aydogdû ve hatiye amadekirin û ji 200 rûpelî pêk tê. Di pirtûkê de bi giştî 4 hezar û 500 gotinên pêşiyan hene.

‘GOTINÊN PÊŞIYAN GENCÎNEYEKE KURDAN E’
Aydogdû dibêje ku gotinên pêşiyan gencîneyeke kurdan e. Naxwazim van gotinên me bi kal û pîrên me re bianx bibin. Loma jî min xebateke bi vî rengî kir. Heger gotinên me yên pêşiyan ango gencîneya me dernekevin li ser rûyê erdê, em jê sûd negirin û pêşkeşî nifşên nû nekin, dê ev xezîneya me jî bi kal û pîrên me re bimirin. Divê em li van gotinên xwe yên pêşiyan xwedî derkevin û nehêlin bi kal û pîrên me re bi ax bibin

‘DEMA MERIV TIŞTEKÎ HEZ DIKE…’
Pirtûka Aydogdû a bi navê ‘Gotinên Pêşiyan’ cara pêşî bi 3 hezar 500 gotinên pêşiyan ve çap dibe. Piştî pirtûk çap dibe Aydogdû dîsa dest bi lêkolînê dike û herî dawî 4 hezar 500 gotinên pêşîyan berhev dike. Aydogdû ji bo xebata xwe wiha dibêje; “Dema mirov ji tiştekî hez dike ev hezkirin bi xwe jî dilê mirov derdikeve. Ya min jî; min ji gotinên pêşiyan pir hez dikir û dixwest xwe hînî gotinên pêşiyan bikim ji ber vê jî dema min gotineke pêşiyan ya nû dibihîst min li ba xwe dinivîsand û jiber dikir qasî ji dest min de dihat min ev gotin bikardianî. Lê piştî çend salan şunde min dît gotinên ku di destê min de, ya ku min li ba xwe nivîsîne hezar gotin derbaskirî ye. Ev dem min biryar da ku ez jî li ser gotinên pêşiyan bixebitim.

Piştî biryarê ez ketim şopa gotinên pêşiyan. Kê ji min re çi digot min li ba xwe dinivîsand pîştî du salan şunda min 3 hezar 500 gotinên pêşiyan berhev kir û wek pirtûkekê çap kir. Di çapa me ya yekem de me gotinên pêşiyan wek alfabeyê ji A yê dest pê kir heta Z yê rêz kir. Her çiqas ev pirtûka min ya yekem bû jî bala gelek kesan kişand û hate xwendin. Li ber vê rewşê jî ez gelekî kêfxweş bûm û min piştî pirtûk çap bû şunda jî lêkolîna xwe dewam kir. Herî dawî ji bo çapa 3yem 4 hezar 500 gotinên pêşiyan berhev bû û me pirtûka xwe çap kir. Îcar di vê çapê de jî me dîsa gotinên xwe li gor alfabeyê rêz kir lê vê carê jî me hinekî ji bo xwendina pirtûkê hêsantir bibe me gotina pêşî ya serê tîpê di rûpelekê de mezin nivîsî û di nav yên din de jî hinek valahî hişt da ku di xwendina pirtûkê de çavê mirov neêşe.”